Main Alehdghi Nahi Chahta Tha - میں علیحدگی نہیں چاہتا تھا

شیخ مجیب الرحمن کے انٹرویوز پر مبنی یہ مختصر سی کتاب بعض ان حقیقتوں کو سامنے لانے کی ایک عاجزانہ سی کوشش ہے جو ابھی تک کھل کر نہ بیان ہو سکی ہیں اور نہ ان کا اعتراف کرنے کی ہم میں ہمت پیدا ہوئی ہے۔ وہ حقیقتیں کیا ہیں؟ یہی کہ بنگالی پاکستان سے آزاد ہونے کا ارادہ نہیں رکھتے تھے اور ان کے منتخب رہنما شیخ مجیب الرحمن پاکستان توڑنے اور بنگلہ دیش کو آزاد کرانے کی سازش نہیں کر رہے تھے۔ بعض انٹرویو 70-1969ء کے ان دنوں پر محیط ہیں جب انتخابات کی تیاریاں ہو رہی تھیں اور عوامی لیگ اپنے چھ نکات جو اس نے 1966ء میں لاہور میں پیش کئے تھے کی بنیاد پر برسر اقتدار آنے کے لئے کوشاں تھی۔ بعض دوسرے انٹرویو جنوری۔ فروری 1972ء میں لئے گئے جن میں شیخ مجیب نے بار بار اس بات کا اعادہ کیا کہ وہ علیحدگی نہیں چاہتے تھے، انہیں اس کی ضرورت ہی نہیں تھی۔ وہ ایک حصے کا سربراہ بننے پر پورے ملک کا وزیر اعظم بننے کو ترجیح دیتے۔
آج جب پاکستان کو دولخت ہوئے اتنے سال گزر چکے ہیں، شیخ مجیب کے ان خیالات کو پڑھنا ماضی کی محض ایک بھولی بسری یاد کی طرح نہیں ہے۔ یہ انٹرویو ہمیں باور کراتے ہیں کہ مزید برس گزرنے کے بعد بھی ہم نے تاریخ سے سبق نہیں سیکھا۔