Zameer - ضمیر

جنگ انسانی جسموں کو ہی گھائل نہیں کرتی ، انسانی ضمیر کو بھی داغ دار کر دیتی ہے ۔ وہ لوگ بھی اس کی زد میں آ جاتے ہیں جو میدان جنگ سے دور ، دنیا کے سیاسی اور تزویراتی مسائل سے لا تعلق ہوتے ہیں۔ جنگ نہ تجربے کو معاف کرتی ہے نہ معصومیت کو ۔
انسان زخمی ہوتے ہیں ، اور پھر ان کے زخموں کے سوداگر آ جاتے ہیں ۔ فلاحی تنظیمیں انسانی المیے کو دولت میں ڈھالتی ہیں ۔
یہ ہے حاقان گوندائے کے ناول "ضمیر" کا موضوع ۔
حاقان گوندائے ترکی کے سرکردہ ناول نگاروں میں سے ایک ، اپنے ناولوں میں جنگ، ہتھیاروں کی تجارت ،اور سب سے بڑھ کر نام نہاد فلاحی تنظیموں پر تنقید کرتے ہیں ۔
ان کا شاہکار ناول، "ضمیر" ایک ایسے بچے کے گرد گھومتا ہے جو مہاجر کیمپ میں پیدا ہوتا ۔ ایک بم دھماکے میں شدید زخمی ہوجاتا ہے ۔ جان بچ جاتی ہے لیکن بم کی کنکریوں سے چہرے پر بننے والے زخموں کے داغ کبھی نہیں جاتے ۔ اس کا نام ضمیر رکھا جاتا ہے ۔
یہ انسان کا داغ دار ضمیر ہے ۔