Chehra Ba Chehra Ro Ba Ro - چہرہ بچہرہ رو برو

”چہرہ بہ چہرہ رُو بہ رُو 1979 ء میں شائع ہوا۔ یہ ایران کی تاریخی شخصیت اور بابی تحریک کی ایک رکن رکین فاطمہ زریں قرۃ العین طاہرہ کی زندگی پر مشتمل ہے۔ اس میں ایران کے متوسط طبقے کی طرزِ زندگی کو بھی پیش کیا گیا ہے۔ ناول کا مرکزی کردار ام سلمٰی یعنی قرۃ العین طاہرہ ہیں۔

جمیلہ ہاشمی نے اپنے اس ناول میں ایک ایسی متنازعہ لیکن عظیم ہستی کو موضوع بنایا ہے جن کا نام آج تک خود ایک افسانہ ہے۔ ام سلمٰی جسے ہم قرۃ العین طاہرہ کے نام سے جانتے ہیں، ایک ایسی بے قرار روح کی مالک تھی جن کے پاس دل بھی بڑا اور دماغ بھی۔

قرۃ العین طاہرہ اصلاح نسواں کے لیے اپنی پوری زندگی وقف کرنا چاہتی تھیں۔ وہ ایران میں حقوق نسواں پر بات کرنے والی پہلی خاتون تھیں۔ انہوں نے 1848ء میں بابی مذہب قبول کرنے سے 4 سال قبل حقوق نسواں اور عورت کے مرد کے برابر حقوق کی بات کی تھی ۔ وہ علی محمد باب پر ایمان لانے والے پہلے 18 لوگوں (جو بابی تاریخ میں “حروف حی“ کے نام سے بھی جانے جاتے ہیں)، میں سے واحد خاتون مبلغہ تھیں۔

بابی کانفرنس میں انہوں نے بے نقاب شرکت کی ۔جس کے باعث اکثر لوگ اُن سے ناراض بھی ہوئے مگر علی محمد باب نے اُن کو”طاہرہ (پاک) “ کا لقب دیا ۔ بابیوں کے خلاف ایران میں مہم چلی اور باب کے ماننے والوں کا انجام دردناک ہوا ۔ قرۃ العین طاہرہ کو پہلے معافی مانگنے اور بابی مذہب چھوڑنے پر اکسایا گیا، جب وہ نہ مانیں تو قید کیا گیا پھر راتوں رات گلا گھونٹ کر ایک اندھے کنوئیں کی نظر کر دیا گیا ۔

وہ واقعی یہ ایسی روح ہیں جنہوں نے منزل کی جگہ راستہ قبول کیا ایک ایسا راستہ جو ان کا اپنا چُنا ہوا تھا ۔ وہ کسی کے بتائے ہوئے راستے پر چل کر منزل تک جانے کے بجائے اپنے ہی بنائے ہوئے راستے پر بھٹکنے پر راضی رہیں۔

اس ناول کا سرورق صادقین نے بنایا تھا ، اس اشاعت میں بھی اسی کو برقرار رکھا گیا ہے۔