Safar Istara Nahi - سفر استعارہ نہیں

"سفر استعارہ نہیں"۔۔۔۔۔۔۔محض سفرنامہ نہیں بلکہ زندگی نامہ ہے .برطانیہ کے اس حالیہ سفرنامہ میں، اپنے ان دوستوں کی کہانیاں اور مشقت کی داستانیں ہیں، جو بچپن میں تعلیم ادھوری چھوڑ کر، بہتر مستقبل کے لیے برطانیہ سفر انداز ہوئے اور پھر یہیں کے ہو کر رہ گئے۔ دیس پردیس ہوا مگر پردیس میں بھی وہ اپنا دیس اپنے ساتھ ساتھ لیے لمحہ بہ لمحہ آب حیات کے گھونٹ پیتے رہے۔ وہ یہاں کے کلچر، معاشرت اور معیشت سے اپنے آپ کو اور اپنی ائندہ نسلوں کو کس طرح سے جوڑ پائے، ہر فرد ایک مختلف اور طویل مشقت آمیز کہانی سنانے کو بے تاب ملا۔

اطہر مسعود نے بجا طور پر جان لیا تھا کہ سفر برطانیہ اور سفر حیات دونوں کی باہم آمیزش سے شاید ایک نئی صنف ظہور پذیر ہونے کو ہے۔

میں تو اپنے فکشن میں بھی زندگی کے حقائق کو قابل خواندگی اسلوب میں پیش کرتے ہوئے، ساتھ تاریخ کا تڑکا لگا دینے کا عادی ہوں۔ مجھے علم ہے کہ لوگ اب تاریخ کو ایک جھوٹ سمجھ کر پڑھنے کے لیے تیار نہیں ہیں،

سفر نامے کو بھی ہمارے سفر نامہ نگاروں نے ایک ایسا جھوٹ بنا دیا ہے کہ لوگ بے اعتبار ہو گئے ہیں مگر "سفر استعارہ نہیں" میں سفر اور زندگی دونوں اپنی تمام تر مسلمہ سچائیوں کے ساتھ کینوس پر مختلف رنگوں کے نقوش کی صورت میں آپ کو دکھائی دیں گی۔

محض تخیل آرائی (مبالغہ آرائی) یا پہلے سے لکھی ہوئی تاریخ پرانی کتابوں سے اٹھا کر، اپنے الفاظ میں بیان کر دینے سے ایک تخلیق کار بری الذمہ قرار نہیں پاتا اسے کچھ نیا بھی پیش کرنا ہوتا ہے اور یہ کتاب اسی نئے کی پیشکش کی ایک ادنی کاوش ہے۔ دیکھتے ہیں اپ کا ذوق کس حد تک اس کی گرفت میں آ پاتا ہے۔