The Hobbit Urdu Edition

 "ہابٹ" ایک پُر خطر مہم کی داستان ہے جس میں بونوں کی ایک ٹولی اُس خزانے کی تلاش میں نکلتی ہے جس پر ایک خوفناک دیوہیکل اژدھا کنڈلی مارے بیٹھا ہے ۔جان جوکھوں میں ڈال دینے والے اس سفر میں بلبو بیگنز نامی ایک پرامن،آرام پسند اور کسی قسم کے عزم و امنگ سے عاری ہابٹ کو بھی بادل ِنخواستہ شامل ہونا پڑا جوبعد ازاں ایک چور کے طور پر اپنی حاضر دماغی اور صلاحیت پر خود بھی حیران رہ جاتا ہے ۔

دیوؤں ، بھتنوں ، بونوں ، پری زادوں ، وارگ بھیڑئیو ں، دیو ہیکل مکڑیوں سے مڈبھیڑ ، عظیم الشان سماگ نامی ایک دہشتناک اژدھے سے ملاقات اور گفتگو اور پانچ لشکروں کی خونی جنگ میں شرکت، یہ سب وہ خطرات او ر واقعات ہیں جن کا سامنا اس سفر کے دوران بلبو کو رہا۔لیکن اس داستان میں کچھ پر لطف لمحات بھی ہیں ، مثلاًبے لوث دوستی،دل خوش کن دعوتیں، ہنسی مذاق اور گیت سنگیت۔۔۔

بلبو بیگنز بچو ں کے ادب میں لافانی کرداروں کی صف میں اپنا مقام بنا چکا ہے۔ اپنے بچوں کی تفریح طبع کے لئے پروفیسرجے آر آر ٹولکین کے تحریر کردہ "ہابٹ"کو1937ء میں اپنی پہلی اشاعت کے ساتھ ہی ناقدین کی جانب سے زبردست دادِ تحسین حاصل ہوئی۔ اگرچہ بذاتِ خود یہ ایک مکمل اور حیرت انگیز داستان ہے ، تاہم یہ "دی لارڈ آف دی رنِگز" کے ابتدائیے کا کردار بھی ادا کرتی ہے ۔